Hoërskool Nelspruit Sosiale Media Invloed Verslag

Hoërskool Nelspruit het groot golwe op sosiale media gemaak met ‘n opmerklike bereik en impak.

Die Sukses van Aeternum 2023 Revue

Een van die belangrikste hoogtepunte van hierdie jaar was ons skool se revue, Aeternum 2023, wat aansienlik baie aandag op die internet, sowel as in tradisionele media, getrek het. Hierdie verslag beskryf die noemenswaardige prestasies en impak van ons skool se sosiale media teenwoordigheid.

Die Aeternum 2023 revue was ‘n groot sukses, met al sewe konserte wat heeltemal uitverkoop was. Hierdie prestasie weerspieël die geweldige populariteit en talent van ons leerders. Die gebeurtenis het ook wydverspreide media-dekking ontvang en het in artikels op prominente platforms soos Lowvelder, Awsum News, Lowveld.net en Radio Laeveld verskyn. Hierdie omvangryke media blootstelling het verder ons skool se reputasie in die gemeenskap gevestig.

Sosiale Media Bereik

Een beduidende prestasie hierdie jaar was ons skool se vermoë om elke lied wat gedurende die revue uitgevoer is, op verskillende sosiale media platforms te deel. Hierdie innoverende benadering het ons in staat gestel om op ‘n ongekende manier met ons gehoor te skakel.

Facebook Rekords

Ons Facebook-bladsy het ‘n sleutelrol gespeel in die vergroting van ons skool se bereik en impak. Ons het alle vorige rekords verbreek met die gedeelde liedjies, en ‘n indrukwekkende bereik van 924,745 Facebook-gebruikers behaal. Hierdie verreikende betrokkenheid het nie net die uitsonderlike talent van ons leerders bekendgestel nie, maar het ook ons skool se toewyding om met die gemeenskap te verbind, versterk.

Groeiende Facebook Volgeling

Buiten die uitstaande bereik het ons Facebook-bladsy ook ‘n aansienlike groei in volgelinge ervaar. Ons het 2,000 nuwe volgers verwelkom, wat ons totale Facebook-volgelinge op ‘n indrukwekkende 20,000 gebring het. Hierdie groei weerspieël die toenemende belangstelling en ondersteuning wat ons skool op hierdie platform geniet.

Word ‘n Borg

Elke jaar bring Hoërskool Nelspruit ‘n asemrowende revue op die planke wat soveel vreugde, aan baie mense bring deur dat emosies met passie en kreatiwiteit gedeel word. Sonder voldoende finansies is dit wel ‘n groot uitdaging om dit te volhou. Daarom vra ons julle hulp. Deur ‘n borg te wees, word julle deel van die span wat wonderlike stories tot lewe bring. Julle sal ook deel wees van ons opwindende bekendstellings. Dit gaan nie bloot oor geld nie, dit gaan oor die ontwikkeling van potensiaal, uitleef van talente en die impak op ons jeug se toekoms.

Finansiële Borgpakkette Nie-Finansiële Borgpakkette

ALUMNI GEDAGTES 1997 – 2022

Wow!  Wat ‘n voorreg om deel te kon wees van die eerste revue!  Definitief was NHS-revue ‘n hoogtepunt in my lewe! PRET! PRET! PRET!
SELME-LOUISE (DU PLESSIS) VAN WYK
(1997 – 1998)
Die revue was regtig ‘n groot deel van my skoolloopbaan en ek sal dit vir niks verruil nie.
Ons het besonderse goeie tye gehad en ons lag nou lekker as ons na die video’s kyk, veral na die dansbewegings wat ons gedoen het teenoor hoe die revue nou is.
JANINE (LOURENS) LOUW
(1999 – 2002)
‘n Mens is verskriklik moeg in die twee weke, maar elke oomblik is net awesome!
LIA (JOUBERT) ODENDAAL
(2002-2003)
Die revue is waar jy leer dat met harde werk en baie pret ‘n betowerende produksie gevorm kan word vanuit die verbeelding van elke mens betrokke. Dit is die plek om uit jou dop te kruip sodat jy jouself, saam met al die toeskouers, in ‘n nuwe lig kan sien.
BJ MATHEY
(2003 – 2007)
Revue was ‘n lewensveranderende ervaring. Ek het vir 16 jaar geglo dat ek nie kan sing nie, maar revue het dit binne in my losgemaak. Sang is nou deel van my daaglikse lewe en sal vir altyd wees! Ek is vir ewig dankbaar!
RUDOLPH SCHUTTE
2003 – 2005
Revue is die gom waar musiek, sang, ritme en dans ‘n groep mense bymekaar hou. ‘n Verstandhouding en samehorigheid word hier gekweek sonder voorbehoud.  Revue het my ‘n baie belangrike lewensles geleer: die beste dinge gebeur as jy uit jou gemaksone tree – van die rugbyveld af tot bo-op die verhoog. 
JP BARNARD
2005
Eerste, is dit die bekendstelling van die tema. Dan, repeteer tot jou voete blase kry, maar dis ‘n klein opoffering, want uiteindelik is dit tyd vir die gordyne om oop te gaan… elke voorbereiding is ‘n stappie nader aan optree voor jou geliefde klasmaats, radikale koshuisondersteuners, trotse onnies en natuurlik, jou grootste ondersteuners – jou ouers. Revue is asem. Revue is kos!
KARA (JANSE VAN RENSBURG) DU TOIT
2005 – 2008
Die revue was vir my ‘n baie goeie ervaring, dit het my die geleentheid gegee om myself te vorm. Dit het ‘n alternatiewe platvorm geskep om verhoudings te bou met interessante mense.
PETRI OESCHGER
2005 – 2007
Revue gee elkeen wat deelneem, of jy die hoofsanger of net ‘n agtergronddanser is, ‘n “feel good feeling”. Daarom gun ek vir elke kind om deel te wees van ‘n revuegroep wat soos familie raak. Wanneer die gordyne ooptrek en die vertoning afskop, kan niks die adrenalien wat mens ervaar oortref nie.
INGE VAN DYK
2005 – 2007
Elke revue-produksie het my laat besef dis lekker om te lewe, want om te dans is om te lewe!
MARAIS BARNARD
2006 – 2009
NHS-revue was ‘n onvergeetlike vyf jaar vol goeie vriende, pret, harde werk en natuurlik ‘n oormaat “glitter”. Van ‘n Droom Dekade tot Lyrics of Life; Queen of hearts tot Bleeding love; vinnig aantrek tot báie vinnig aantrek – ‘n onvergeetlike vyf jaar vir altyd in my hart gegraveer.
MINETTE (TOLLIG) VISSER
2006 – 2010
Revue is die aktiwiteit waar ‘n ieder en elk welkom is, van rugbyspeler tot boekwurm.  Dis die plek waar mens werklik eers besef wat Nellie-guts is. Revue was en is steeds ‘n hoogtepunt in my lewe – voor, gedurende en selfs na my hoërskoolloopbaan. 
JANA (VAN TONDER) KOTZE
2006 – 2009
Wat ‘n voorreg om elke aand vlinders in jou maag te hê voor die gordyne oopgaan en om na die tyd te hoor hoe mense klap vir ‘n encore. Dis ‘n voorreg om deel te kon wees van een van die beste skoolproduksies in die land, wat die fondasie gelê het vir die lewe wat ek nou het. Wat ‘n fees is dit nie om te kan weet die tradisie leef voort vir ‘n twintigste jaar nie? Hou so aan Nellies, want as my borsbeen aanhou jeuk dan weet ek my hart klop nog geel, groen en swart – Palmam qui meruit ferat. Ek is trots op julle en geluk met die besondere mylpaal!
JIMMY PRESSLY
2006 – 2009
NHS-revue het vir my as mens nie net geleer hoe om te dans en te sing nie, maar ook hoe om dit te doen met ‘n glimlag terwyl ‘n mens doodmoeg is. Die harde werk en lang ure was beslis meer as die moeite werd en geen hoeveelheid woorde kan beskryf hoe prettig en spesiaal dit elke liewe jaar was nie.
CARIENNE STRYDOM
2006 – 2009
NHS-revue is waar ‘n klomp vriende bymekaar kom aan die begin en as ‘n familie daar wegstap. Die samesyn, lag, huil op die laaste aand, die waarde wat ‘n mens voel met die applous aan die einde van elke optrede – dit is en sal altyd by my bly.
WAYNE TEMPEL
2006 – 2008
Die revue was vir my ‘n voorreg, want dit het die geleentheid geskep om jongmense uit alle lewensrigtings te ontmoet en om ons passie uit te leef.
STADLER KOK
2007 – 2008
Om deel te kon wees van NHS se revue was ‘n wonderlike voorreg en ‘n absolute eer. Dit het soveel deure vir my oopgemaak.
ROCHELLE (JACOBS) ROOS
2007 – 2009
Dit is waar ek my liefde vir sing en “performing” gevind het. Ek sal vir ewig en altyd onthou hoe ons op Michael Jackson se Dangerous gedans het en ons optrede onthou van die Rocky Horror Picture Show se Time Warp. 
CHIMENE (KUNNEKE) DE VILLIERS
2007 – 2009
Die revue was vir seker een van die hoogtepunte in my skoolloopbaan. Daar is baie goeie vriendskappe gevorm, hard geoefen, maar daar was altyd tyd vir lag. 
ELANA SWANEPOEL
2007 – 2010
Die revue het my geleer om baie hard te werk, om jou tyd goed te bestuur en ook om alles te gee. Terselfdertyd was dit nog vrek lekker ook!
OAN DE WAAL
2008 – 2009
Die revue het my toegelaat om my talent uit te leef op die verhoog, en saam met dit het dit my baie gehelp met selfvertroue. Die revue leer mens ook van goeie dissipline, samewerking en volharding- ek is nou nog trots op die produksies waarvan ek deel kon wees.
JUDITH (BRUWER) SEVENSTER
2007-2009
Dit was ure se oefeninge en harde werk, maar dit was alles die moeite werd. Ek het nuwe lewenslange vriende gemaak wat ek nooit sou kon doen sonder die revue nie.
TARRYN (COETSEE) MARITZ
2008 – 2010
Die revue het ‘n groot rol gespeel in my lewe as lid van ‘n multi-kulturele hoërskool. Dit het help bou aan my selfvertroue, uithouvermoë en dissipline. My herinneringe aan die revue sal my by bly vir die res van my lewe.
MPHO MODUPI
2009 – 2010
Revue het my gehelp om ‘n deel van myself te vind, ‘n deel wat ek nooit geweet het ek het nie. Dit het my die wysheid gegee om enige avontuur in die lewe na te jaag.
CHANTE-LIZE GREEFF
2009 – 2012
Ons was so bevoorreg om in die revue te kon wees! NHS-revue staan soos ‘n baken in my hoërskooljare uit en ek bedank elkeen wat hierdie baken so helder laat skyn het.
IGNUS MARÉ
2009 – 2010
Hoërskool Nelspruit revue het drasties en met reuse spronge die boustene van my toekoms uitgelê, al het ek dit nie self besef nie. Die vreugde wat ek ervaar het op die verhoog van die Stadsteater het die saad geplant wat ek vandag die voorreg het om daagliks die vrugte van te geniet. Dankie NHS!
JONATHAN RAATH
2009 – 2012
Die blootstelling, vriendskappe en adrenalien om op ‘n baie professionele vlak voor ‘n gehoor in die teater op te tree, gee jou baie selfvertroue om situasies in die toekoms te hanteer! Dit was ‘n belewenis om deel van NHS se revue te wees!
ANJE VAN DYK
2010 – 2012
My passie vir die verhoog was nog altyd daar, maar NHS-revue was my bevestiging. Nie net was dit my jaarlikse hoogtepunt nie, maar ook ‘n ongelooflike ondekkingsreis. Die selfvertroue wat ek vandag het, is grootliks te danke aan die revue en die mense wie daarby betrokke is. Ek sal dit altyd wil herleef.
KRISTEN RAATH
2010 – 2014
Revue is ‘n samekoms van ‘n klomp uiteenlopende mense, wat sonder dat hulle dit besef, een van die lekkerste herinneringe saam bou.
NAOMI STEINBERG
2011 – 2015
NHS-revue het my lewe verander. Dis waar ‘n mens vriende maak wat jy nooit gaan vergeet nie, waar jy talente ontdek wat jy nooit kon dink jy het nie, waar jy groei en groot word. Sonder NHS-revue sou ek nie wees waar ek vandag is nie.
ANIKE VAN DER MERWE
2011 – 2014
Al die harde werk, laat aande, dieselfde bewegings oefen totdat dit tweede natuur is, so moeg geoefen wees dat jy nie kan staan nie – dit is elke oomblik die moeite werd as jy op die verhoog  stap en hoor hoe die mense juig as die vertoning begin!
STEFAN VAN ZYL
2011 – 2012
Revue was ‘n openbaring en vaslegging van my talente en vermoëns. Ek het ook besef dat ek ‘n ongelooflike liefde het om op te tree voor baie mense. Ek bedank hierdie skool wat vir kinders die kans gee om ‘n onbekende stukkie van hulself te ontdek, deur so ‘n tipe produksie te laat geskied.
ANDREA VAN TONDER
2012 – 2013
Om op die verhoog te staan en die gehoor te aanskou, laat jou besef dat dit dít is waarvoor jy gewag het – en dan gee jy jou beste! Revue bepaal die ritme van jou hart!
HANNO BARNARD
2013 – 2014
Ek dink dit is ongelooflik dat ‘n skool elke jaar ‘n revue kan hê. Die drie jaar wat ek deel was van NHS se revue was die drie beste jare op skool vir my!
LOURENS KOEKEMOER
2013 – 2015
Revue het my gevorm tot wie ek vandag is! Die revue-familie het my gemotiveer om die beste ek te wees!
NICOLE PRUIS
2013 – 2015
‘n Tyd wat ek baie geniet het en baie ander persoonlikhede in die skool leerken het. Die beste gedeelte was om stoom af te blaas op die verhoog deur groot te gaan met jou dans moves en niemand het gedink jy is weird nie.
HERNUS PIETERS
2013-2014
In revue week is dit asof jou hele wêreld stil gaan staan en jy in ‘n ander wêreld leef. Ek voel trots om deel te wees van iets wat aanhoudend verbeter en sien uit om die verrassings van die toekoms te aanskou.
CHARLES DE KOCK
2015 – 2018
Revue het my geleer hoe om met my tyd te werk asook om in ń sekere tydperk ń hoeveelheid goed klaar te kry en af te handel. Revue het my selfbeeld “geboost” Agv revue wat baie tyd van my gevat het op skool het ek geleer hoe om spaarsamig te werk met my tyd en om nie gestres te wees as iets in ń kort tydperk gedoen moet word nie.
LANÉ TALJARD
2018-2021
‘n Plek waar vriende werklik familie raak en talente in jou raak gesien word wat jy nie eers geweet het jy het nie! Dis ‘n plek waar herinneringe gekweek word wat ‘n leeftyd hou!
ADRIENNE COMBRINK
2019-2022
Dit was n ongelooflike voorreg om deel van die revue te wees. Nie net was dit lekker om op te tree nie, almal het n familie geword wat mekaar ondersteun en elke oomblik vet-pret maak. Ek verlang elke dag terug na die revue en my ‘familie’. Ek sal enige tyd weer terug gaan en alles oor beleef!
ZIMRI LEUVENNINK
2020-2022
Uitputtend, tydrowend maar ASEMROWEND!
My 5-jaar Revue was verseker (en is nog steeds) die hoogtepunt van my Hoërskool loopbaan – die rede date k weer sal inskryf as ‘n leerder by NHS.
RENE BEKKER
(2013 – 2017)